🔴 "पुढील दरवर्षी ५ विद्यार्थी दत्तक घेणार!" - उपसभापती राजेश सावंत यांची ऐतिहासिक घोषणा
कणकवली:
प्राथमिक शिक्षण समितीच्या वतीने आयोजित 'दत्तक विद्यार्थी गुणगौरव व शिक्षक सन्मान सोहळा' नुकताच उत्साहात पार पडला. या कार्यक्रमात बोलताना पंचायत समितीचे उपसभापती राजेश सावंत यांनी एक अत्यंत स्तुत्य आणि ऐतिहासिक घोषणा केली. " मी पुढील दरवर्षी पाच गरीब व गरजू विद्यार्थ्यांचा संपूर्ण शैक्षणिक खर्च उचलणार आहे," असे आश्वासन त्यांनी यावेळी दिले.
राजेश सावंत यांनी आपल्या भाषणात महाराष्ट्र राज्य प्राथमिक शिक्षक समितीच्या सामाजिक कार्याचे विशेष कौतुक केले. केवळ शिक्षकांच्या हक्कासाठी न लढता, समाजातील शेवटच्या घटकातील विद्यार्थ्यांचा विचार करणारी ही समिती खऱ्या अर्थाने कौतुकास्पद असल्याचे त्यांनी नमूद केले. वाढत्या खासगीकरणाच्या काळात जिल्हा परिषद शाळांची पटसंख्या टिकवणे हे एक मोठे आव्हान आहे. हे आव्हान पेलण्यासाठी वारगाव नं. ३ येथील शाळेप्रमाणेच इतर शाळांमध्येही नाविन्यपूर्ण उपक्रम राबवण्याची गरज त्यांनी व्यक्त केली.
हुशार असूनही केवळ आर्थिक परिस्थितीमुळे शिक्षण घेण्यास अडचणी येणाऱ्या मुलांच्या पाठीशी खंबीरपणे उभे राहणे हे आपले कर्तव्य असल्याचे सांगत, त्यांनी या दत्तक योजनेत आपला सक्रिय सहभाग जाहीर केला. यावेळी व्यासपीठावर सभापती हर्षदाताई वाळके, सुशांत मर्गज, राजन कोरगावकर, भाई चव्हाण आणि शिक्षण क्षेत्रातील इतर मान्यवर उपस्थित होते. उपसभापतींच्या या संवेदनशील निर्णयाचे सर्व स्तरातून स्वागत होत आहे.
कोणत्याही टिप्पण्या नाहीत:
टिप्पणी पोस्ट करा