महाराष्ट्र राज्य प्राथमिक शिक्षक समिती शाखा कणकवली तालुका त्रैवार्षिक अधिवेशन : सन 2025

महाराष्ट्र राज्य प्राथमिक शिक्षक समिती शाखा कणकवली तालुका त्रैवार्षिक अधिवेशन : सन 2025

 

कणकवलीत शिक्षक समितीचे त्रैवार्षिक अधिवेशन उत्साहात संपन्न

कणकवली, दि. ११ : महाराष्ट्र राज्य प्राथमिक शिक्षक समिती, शाखा: कणकवली तालुका यांचे त्रैवार्षिक अधिवेशन नुकतेच कणकवली येथील मराठा मंडळात तालुकाध्यक्ष टोनी म्हापसेकर यांच्या अध्यक्षतेखाली मोठ्या उत्साहात पार पडले. या अधिवेशनात शिक्षक, विद्यार्थी आणि मान्यवरांची मोठी उपस्थिती होती.

कार्यक्रमाची सुरुवात महिला आघाडीच्या सदस्यांच्या ईशस्तवन आणि स्वागतपद्याने झाली. राज्य शिक्षक नेते उदय शिंदे यांच्या हस्ते अधिवेशनाचे उदघाटन करण्यात आले. राज्य महासचिव राजन कोरगावकर , जिल्हाध्यक्ष विठ्ठल गवस , जिल्हा सचिव तुषार आरोसकर , महिला जिल्हाध्यक्षा निकिता ठाकूर , राज्य कार्यकारिणी सदस्य दादा जांभवडेकर , सचिन मदने , संतोष परब , जिल्हा शिक्षक नेत्या सुरेखा कदम , ज्येष्ठ मार्गदर्शक चंद्रकांत अणावकर हे यावेळी प्रमुख पाहुणे म्हणून उपस्थित होते. त्यावेळी तालुकाध्यक्ष टोनी म्हापसेकर , सचिव संतोष कांबळे , जिल्हा उपाध्यक्ष धीरज हुंबे , रुपेश गरुड , जिल्हा कार्याध्यक्ष संतोष कुडाळकर , जिल्हा विभाग उपाध्यक्ष अजय तांबे , जिल्हा प्रसिद्धी प्रमुख विनायक जाधव , जिल्हा विभागीय उपाध्यक्ष किशोर गोसावी , जिल्हा सल्लागार संदीप गोसावी , जिल्हा संघटक निलेश ठाकूर , ईश्वरलाल कदम , पतपेढी संचालक नारायण नाईक , श्रीकृष्ण कांबळी , पतपेढी उपाध्यक्षा ऋतुजा जंगले , चंद्रसेन पाताडे , मंगेश कांबळी , महिला तालुकाध्यक्षा नेहा मोरे , महिला तालुका सरचिटणीस विनिता शिरसाट , जिल्हा कार्यकारी सर्व सदस्य , तालुका कार्यकारिणी सदस्य आणि सभासद शिलेदार बहुसंख्येने उपस्थित होते. तालुकाध्यक्ष टोनी म्हापसेकर यांनी प्रास्ताविक केले, तर मागील तीन वर्षांच्या कार्याचा अहवाल वाचण्यात आला.

या अधिवेशनात संघटनेच्या वतीने सामाजिक बांधिलकी जपत २२ केंद्रांतील २२ दत्तक विद्यार्थ्यांचा गुणगौरव करण्यात आला. यासोबतच, शिक्षण क्षेत्रात प्रदीर्घ सेवा बजावलेल्या १३ सेवानिवृत्त शिक्षकांचा आणि विविध पुरस्कार प्राप्त केलेल्या ४ शिक्षकांचाही सत्कार करण्यात आला. विविध क्रीडा व शैक्षणिक स्पर्धांमध्ये उत्कृष्ट यश मिळवलेल्या ४८ विद्यार्थ्यांचाही यावेळी समारंभपूर्वक गौरव करण्यात आला.

राज्यातील ज्येष्ठ शिक्षक नेत्यांनी यावेळी उपस्थित शिक्षकांना संघटनात्मक मार्गदर्शन केले. मान्यवरांनी आपल्या भाषणातून अधिवेशनाला शुभेच्छा दिल्या. यानंतर सन २०२५ ते २०२८ या पुढील तीन वर्षांसाठी नवीन कार्यकारिणीची घोषणा करण्यात आली. मागील कार्यकारिणीने केलेल्या उत्कृष्ट कार्याबद्दल त्यांचे आभार मानण्यात आले आणि नवीन कार्यकारिणीचे उत्साहात स्वागत करण्यात आले.

दुपारच्या सत्रात सर्व शिक्षक सदस्यांसाठी स्नेहभोजनाचा कार्यक्रम आयोजित करण्यात आला होता. त्यानंतर शिक्षकांनी एकत्र येत विविध गुणदर्शन कार्यक्रमांचे आयोजन केले होते, ज्यात अनेक शिक्षकांनी आपली कला सादर केली. सायंकाळच्या सत्रात समितीच्या शिक्षक सदस्यांनी 'यक्ष उद्धार' हे प्रसिद्ध दशावतारी नाटक सादर करून उपस्थितांची मने जिंकली आणि रसिकांकडून भरभरून दाद मिळवली.

एकंदरीत, कणकवली तालुका प्राथमिक शिक्षक समितीचे हे त्रैवार्षिक अधिवेशन अत्यंत उत्साहात आणि खेळीमेळीच्या वातावरणात संपन्न झाले. या अधिवेशनातून शिक्षकांना नवीन ऊर्जा मिळाली आणि पुढील वाटचालीस प्रेरणा मिळाली, असे मत उपस्थितांनी व्यक्त केले. कार्यक्रमाचे सूत्रसंचालन राजेश कदम, सुशांत मर्गज यांनी केले , तर आभार प्रदर्शन तालुका सरचिटणीस संतोष कांबळे यांनी केले. 

17 मार्च 2025 रोजी सिंधुदुर्गनगरीत गर्दीने उच्चांक गाठलेला दिसायला हवा.

⭕महाराष्ट्र राज्य प्राथमिक शिक्षक समितीची आंदोलनाची हाक 

🔸तळेरे विभागात सहविचार सभेला बहुसंख्य समितीचे पाईक उपस्थित* 

 🔹सर्व पदाधिकाऱ्यांनी केले हृदय आवाहन

खारेपाटण : 

          15 मार्च 2024 च्या संच मान्यतेच्या विरोधात महाराष्ट्र राज्य प्राथमिक शिक्षक समितीने कंबर कसली आहे. राज्यभरात सर्व जिल्ह्यात सोमवार दिनांक 17 मार्च 2025 रोजी शिक्षक समितीचे सर्व पाईक शिलेदार आपापल्या जिल्ह्याच्या मुख्य ठिकाणी आवाज उठवणार आहेत. त्यासाठी सर्वांनी मोठ्या संख्येने उपस्थित राहण्याची जबाबदारी प्रत्येकाची आहे. 

          आपल्या शिक्षक बांधवांवर जेव्हा केव्हा आंदोलन करण्याची वेळ येते, तेव्हा तेव्हा होणारे आंदोलन बहुसंख्येने होत असते याचा अनुभव प्रत्येकाने घेतलेला असेल. पण हल्ली अनेकदा आंदोलने करावी लागतात म्हणून कि काय, रोज मरे त्याला कोण रडे असं अजिबात समजून चालणार नाही. 

          अन्यायाची चीड आहे ना, मग आता मागे राहून कसे चालेल ?  न्यायाची सदैव चाड बाळगणारे आम्ही अजिबात डिस्चार्ज होऊन चालणार नाही. गेली कित्येक वर्षे आपली संघटना विद्यार्थी, शिक्षक, पालक आणि शिक्षण यांचाच विचार करुन लढा देण्याचे कार्य करते आहे. आपण त्याचा भाग होऊन संघटनेला एका अत्युच्च उंचीवर नेऊन ठेवण्याचे महत्वाचे कार्य केलेले आहे. आपल्याला गरज असते, तेव्हाच आपण संघटनेला जवळ करणार असू तर मात्र कठीण आहे. संघटना म्हणजे आपण सर्वजण आहोत. आपण एकटे नसलो तर संघटनेला काय फरक पडणार आहे असे म्हणणे चुकीचे आहे. असे अनेकांनी म्हटले तर संघटनेची ताकद कमी कमी होत जाणार हेच शासनाला अपेक्षित आहे. त्यांचं फावलं तर तेच त्यांना हवं आहे. पण आपण त्यांना तसं होऊ द्यायचं नाहीय. कितीही काहीही झालं तरी आपल्याला आता निकराने लढा देण्याशिवाय अजिबात पर्याय नाही. म्हणून आपण सर्वांनी मिळून शासनाला आपली एकी दाखवून देण्याची वेळ आली आहे. 

          आपल्या अनेक मागण्या मान्य होण्यासाठी आपल्याला पुन्हा पुन्हा लढावं लागेल, आता धडाकेबाज होऊन धुमधडाका करत राहायला हवा. आपल्या मागण्यांचे फटाके सतत फुटत राहायला हवेत. फुसक्या फटाकेवाले आपण नाही आहोत. आपण जबरदस्त नेतृत्व बाळगणारे प्रामाणिक शिलेदार आहोत. त्यामुळे आता घरी बसून whats app वर काय चाललंय ते बघून चालणार नाही. प्रत्यक्ष आंदोलनाच्या युद्धात सहभागी झाल्याशिवाय गत्यंतर नाही. 

          जागतिक महिला दिन नुकताच साजरा झाला. आपल्या शिक्षिका भगिनी महिलांनी या आंदोलनास नेहमीपेक्षा जास्त साथ दिली तर खऱ्या अर्थाने आपला लढा तीव्र होणार आहे. 

          सकाळची शाळा करुन दुपारच्या आंदोलनासाठी सर्व पुरुष सदस्य आणि महिला सदस्या यांनी ठरवले तर ते सर्वजण येऊ शकतात. सेवानिवृत्त झालेले शिक्षक पदाधिकारी देखील यात सहभागी होतील. नुकतेच नोकरीला लागलेले शिक्षण सेवकही यांत सामील होणं गरजेचं आहे. ही सर्वांचीच लढाई आहे. पदवीधर शिक्षक अतिरिक्त होणार एवढेच आपल्याला समजले आहे. परंतु ही सुरुवात आहे. हळूहळू उपशिक्षक अतिरिक्त होणार हे कळण्याइतका आपला सर्वांचाच अभ्यास झालेला आहे. 

          उठा, जागे व्हा. आता तुम्ही प्रत्येकाने बाहेर पडा. कोण बाहेर पडतो बघूया असे अजिबात म्हणू नका. तुम्हाला तुमची अस्मिता बोलावते आहे. 17 मार्च 2025 रोजी सिंधुदुर्गनगरीत गर्दीने उच्चांक  गाठलेला दिसायला हवा. आणि हो, सर्वांनी आंदोलनाच्या शेवटच्या क्षणापर्यंत थांबायला हवं हेही तितकंच खरं आहे. 

          दुपार असणार आहे. उन्हे मी म्हणणार आहेत. तरीही आपण न डगमगता निसर्गाला आणि दु :शासनाला पार करण्याची तयारी करायला हवी. नाहीतर खूप कठीण आहे असं म्हणत भाजत राहायचं का ? तुम्ही या सगळे. मीही येतोय. सगळ्यांचे फोटो काढायचे आहेत. मोबाईल हँग झाला तरी चालेल, आपल्याला हँग व्हायचे नाही हे नक्की. 

🔹 तालुका प्रसिद्धी प्रमुख

महाराष्ट्र राज्य शिक्षक समिती, शाखा : कणकवली तालुका

सन्मान मातांचा

महाराष्ट्र राज्य प्राथमिक शिक्षक समिती शाखा कणकवली,महिला आघाडी तर्फे आज आंतरराष्ट्रीय महिला दिनानिमित्त उपजिल्हा रुग्णालय कणकवली येथे सन्मान मातांचा हा उपक्रम आयोजित करण्यात आला. या उपक्रमासाठी वैद्यकीय अधिकारी डॉ. पंकज पाटील,वैद्यकीय अधीक्षक डॉ. विशाल रेड्डी, क्ष-किरण वैज्ञानिक अधिकारी डॉ. अशोक नारकर, सिस्टर श्रीम. प्रिया कदम, तालुकाध्यक्ष सन्मा.टोनी म्हापसेकर, सचिव संतोष कांबळी, महिला आघाडी जिल्हाध्यक्ष सन्मा.निकिता ठाकूर, पतपेढी उपाध्यक्ष ऋतुजा जंगले, महिला आघाडी तालुकाध्यक्ष नेहा मोरे, जिल्हा प्रवक्ता विनायक जाधव, महिला आघाडी तालुका सचिव विनिता शिरसाट, जिल्हा सल्लागार संदीप गोसावी, सुभाष गावकर,सारिका पवार,कविता पावसकर, स्नेहा गोठणकर, अनुजा कदम, सुप्रिया महाजन,सविता आर्लेकर इत्यादी उपस्थित होते.

      नवजात बालकांच्या मातांना फळे व ड्रायफ्रूट्स यांचे वाटप करण्यात आले.

 सर्वांना मनःपूर्वक धन्यवाद🙏🙏