🛑 रक्तदाती : शिक्षक समिती
रक्ताचं दान हे जणू प्राणांचं दान आहे. एखादा गरजू त्या रक्तामुळे मृत्यूच्या जबड्यातून परत येऊ शकण्याची ताकद त्यात आहे. याचं महत्त्व आणि निकड लक्षात घेऊनच महाराष्ट्र राज्य प्राथमिक शिक्षक समिती दरवर्षी रक्तदानाचं शिबीर आयोजित करीत असते.
गेल्या शनिवारी कणकवली तालुका शाखेच्या वतीने रक्तदान शिबीर संपन्न झालं. त्यात तीस रक्तदात्यांनी रक्तदान केलं. या सर्व रक्तदात्यांचे आभार मानावे तितके कमीच आहेत. या समितीच्या पाईकांनी शिक्षणाचं व्रत जोपासत असताना ' रक्तदान हेच श्रेष्ठदान ' हे ब्रीदवाक्य जाणून उत्स्फूर्तपणे रक्ताचं दान केलं आहे. त्यांच्या या दानाला दाद दिली पाहिजे.
त्यांच्या शरीरातील एकेक रक्ताचा कण रक्तपेढीसाठी महत्त्वाचा आहे. या निरोगी शिक्षकांनी दिलेलं रक्त कोणासाठी तरी प्राणदान ठरणार आहे. ज्याला रक्ताची निकड असेल त्या व्यक्तीलाच त्याचं महत्त्व अधिक पटीने समजू शकतं.
सकाळी लवकरच रक्तदान शिबीर सुरु झालं. त्यावेळी पुरुष शिक्षकच नव्हे तर महिला शिक्षिका देखील रक्तदान करायला आल्या होत्या. रक्त देत असताना त्यांचा आनंद गगनात मावत नव्हता. हसतमुखाने रक्त देताना मी त्यांना पाहत होतो. त्यांचे चेहरे टिपत होतो. त्यातील काही शिक्षक बांधव दर तीन महिन्यांनी रक्तदान करणारे आहेत. अर्थात आपल्या शरीराची तपासणी केल्यानंतरच रक्तदान करता येते. काहींना ते करता आलं नाही म्हणून त्यांचे चेहरे हिरमुसलेले झाले होते. मनात द्यायचं असतं , पण देता येत नाही ही त्यांची खंत होती. ते सक्षम होतील तेव्हा पुढच्या वेळी नक्कीच रक्तदान करतील यांत तिळमात्र शंका नाही.
शनिवारी सकाळची शाळा करुन रक्तदानासाठी गडबडीने येणाऱ्या शिक्षकांना मानायलाच हवे. समितीचा हा एक समाजोपयोगी उपक्रम असला तरी त्याला हे सर्व शिक्षक समितीचे पाईक समर्थपणे साथ देतात म्हणूनच हा उपक्रम यशस्वी होऊ शकतो. शिक्षक समितीच्या पदाधिकारी यांनी या शिबिराच्या यशस्वीतेसाठी केलेली धडपड आणि त्याचं परिपूर्ण नियोजन हेही कौतुकास्पद आहे. सर्व पाईकांचे हार्दिक आभार.
©️ प्रवीण अशितोष कुबल ( 9881471684 )
